શનિવારથી IPLની 18મી સીઝન શરૂ થઈ રહી છે. પહેલી મેચ ડિફેન્ડિંગ ચેમ્પિયન કોલકાતા નાઈટ રાઈડર્સ અને રોયલ ચેલેન્જર્સ બેંગ્લુરૂ વચ્ચે રમાઈ રહી છે અને પહેલી જ મેચમાં વિવાદ શરૂ થઈ ગયો. સુનીલ નારાયણ આનું કારણ બન્યા. સુનીલ નારાયણનો પગ વિકેટને સ્પર્શ્યો, છતાં તેને હિટ વિકેટ આઉટ આપવામાં આવ્યો નહીં.
ઘણા ફેન્સ કહી રહ્યા છે કે આ ખોટું છે. સામાન્ય રીતે જ્યારે કોઈ બેટ્સમેન પોતાના બેટ અથવા શરીરના કોઈપણ ભાગથી વિકેટને ફટકારે છે ત્યારે તેને હિટવિકેટ આઉટ આપવામાં આવે છે. પરંતુ સુનીલ નારાયણના કિસ્સામાં આવું બન્યું નહીં. અમ્પાયર દ્વારા તેને આઉટ ન આપવો એ નિયમોની વિરુદ્ધ નથી પણ નિયમો મુજબ છે.
સુનીલ નારાયણનું બેટ સ્ટમ્પને સ્પર્શ્યું
કોલકાતા નાઈટ રાઈડર્સની ઈનિંગની આઠમી ઓવરમાં, સુનીલ નારાયણનો પગ સ્ટમ્પને સ્પર્શ્યો, પરંતુ તેને આઉટ આપવામાં આવ્યો નહીં. આ બોલ RCB બોલર રશિકલ સલામ ડારે ફેંક્યો હતો, જે વાઈડ હતો. સુનીલ નારાયણએ બોલને ઓફ સ્ટમ્પની બહાર બેટ પર લઈ જવાનો પ્રયાસ કર્યો, પરંતુ તે ચૂકી ગયો અને બોલ વાઈડ ગયો.
આ દરમિયાન તેનું બેટ સ્ટમ્પ સાથે અથડાયું. આ ઘટના ઓવરના ચોથા બોલ પર બની હતી. ફેન્સને આશા હતી કે સુનીલ નારાયણ પરનો ખતરો ટળી જશે, પણ એવું થયું નહીં. અમ્પાયરે તેને આઉટ ન આપ્યો.
જાણો શું છે નિયમો
અમ્પાયરનો આઉટ ન આપવાનો નિર્ણય સંપૂર્ણપણે નિયમો મુજબ છે. આ આઉટ આપવામાં આવ્યો ન હતો કારણ કે અમ્પાયરે બોલને પહેલાથી જ વાઈડ જાહેર કરી દીધો હતો. MCC નિયમ 35.1.1 મુજબ, જો બોલ ડેડ ન હોય તો બેટ્સમેન હિટ વિકેટ આઉટ થાય છે. અમ્પાયરના નિર્ણય પછી, બોલ ડેડ થઈ જાય છે અને અહીં પણ એવું જ બન્યું. અમ્પાયરે બોલને વાઈડ જાહેર કર્યો અને ત્યારબાદ સુનીલ નારાયણનો પગ સ્ટમ્પ સાથે અથડાયો. આ કારણોસર તેને આઉટ આપવામાં આવ્યો ન હતો.